Pages

Wednesday 7 September 2011

Badang ko apo?

 

Rhayo lopeh, toghuk den. TAK DO BIBIK!!! Sumo den buek sendiri. Monangieh den. Dari poii carik daging mantai sampailah morondang. Askar den duo oghang yo. Masa mudo lu, tak nak branak bobanyak, kan dah susah. Balik2 duo oghang tu yo lah nak den koghah.  Kalau tak labu, labi lak kono panggil. Muko eh tok sah cakaplah. Komain masam laiiee! Manieh lak laiie asam koping.

Darhi pagi den tak bodiam. Ko bayangkanlah, daging 5 kilo bolun siang, ayam ompek ekor dah tolontang kek singki tu haa.  Bawang, halio, kunyit sumo bolun kupeh laiie. Cili api bun bolun pongopan. Sibbaik den ni tak ulit buek kojo. Tu pun mak den, kak wok, nolong gak kupeh bawang bagai.

Lopeh tu kan, abang ipar den, alah laki akak den, borhajat lak nak buek lomang. Tak ko pengsan ko kek situ, dongar eh. Iiii haiii, den tak nak campur doh. Kau bueklah sendiri yo.

 

014  Leceh kojo eh. Momulo, salur lah buluh tu pakai daun pisang.

 

015 Lopeh tu, susun dalam baldi, sanda kan kek topi tiang.

 

021

Masukkan boreh pulut yang dah campu ngan santan. 5 kilo boreh pulut, 5 kilo gak santan eh. Sambil masuk tu tok sah hontak2 lak buluh tu. Jangan lupo lotak garham kasa sogonggam sotongah tapi jangan lak gonggam kuek na yo! (cam tu lah posan mak montuo akak den).

 

036 Dah sudah masuk boreh pulut, bakar lah lomang tu. Jangan moriah na lak api eh, bokorhak lomang tu kang, tak sodap.

 

039  Abang ipar den ni memang pakar jago lomang. Tauu yo deh nak jauh ko, nak dokekkan ko, bagho api tu. Elok lomang eh, tak bokoghak lansung. Den nak puji akak den gak, halalan thoyyiba botul kekdah isi lomang eh. Elok botul lomang eh. Tak basi sampai ghayo ketigo. Cayalah!

Cam tu lah cito ghayo den. Bukan tak do oghang nolong, ado tapiiii.........paham2 yo lah. Kang den cakap bobanyak doso lak. Sabar yo lah.

Hari ini mesin translator saya masih bercuti raya. Jauh kampungnya, nuuun di Switzerland. Tak bagi cuti nanti mogok merajuk pulak.  Mahap ye pada yang kurang faham. Alah kalau translate pun tak semenggah jugak. Hehehehehe.

6 comments:

TopsyTurvyMum said...

den mampu lomang segore nona ajoo *belasahh..janji ada bunyi*

Aidah said...

Samolah ngan akak. Asa ado jua yang sogorho, akak sambar yo. Den memang pomaleh, ngaku. Hehehe.

Dinas Aldi said...

Nak try jugak spiking nogori..

Den takdo lomang, ado ketupat pulut yo, itupun den boli yg montah, balik ghubuih yo..

Rasa macam ke laut ja loghat nogori cek ni, kahkah

Aidah said...

Whoooaaa! Cek kaguum. Kat mana hang belajaq? Almost perfect tuh. Kirim salam sama cikgu hang na.

p/s Akak ni ramai kawan orang Penang tapi dah lama tak bersembang ngan depa, berkaratlah bahasa akak. Hihi.

Tijah said...

maso kocik2 maghin ghoma hontak2'an lomang tu maso masok'an pulut. apo muntah deh. maghah amek sazah tem tu.

selamat aghi ghayo kak!

Aidah said...

Tu lah den kobar seksiap . Kopantangan nombo satu tuu. Osah ponek eh molomang ni jah. Tapi selegho tajam, canno nak buek kan.